Es isch würkli en Erlebnis gsi, mir hend in Stadelhofe aagfange, sind bis zum Bellevue iipfercht nebed emene Lovemobil gloffe (inklusive Schlägerei zwüsched Hochpubertierende und dem Aff, wo mit sinere Pfefferpischtole für tränendi Auge und Gschtank gsorgt het. Bim Bellevue voll abgange, super Platz zum Tanze. Quaibrugg hämmer ussloh, sind denn alle Stages aaglofe und wieder ie is Getümmel, nebed em Lovemobil und hinderem mitgloffe, denn wieder use, gmüetlich inere Beiz öppis trunke, dann bim Bahnhof Engi nomol go abtanze, döt au e guets Plätzli mit e chli Platz, gewaltige Bäss, e Hammer Soundqualität, echt de Wumms! Denn i Böge wieder retour, i dMengi ie simmer denn nümme, hends vo wiiter hinne gnosse, überall i de Stadt Mensche, total irre, Uusnahmezustand zwüsched Bankgebäude und Fraumünster, echt de Wahn. Wa wär do scho ein chline Dub in Wilkingston? Mein Gott. Chapeau Tsüri. Am Schluss a de Limmat nomohl öppis go trinke, dött lässi Lüüt kenneglernt, en Appezeller und eini vo de Nordsee, e luschtigs Päärli. Am 23.05 mit em Zug heigfahre. Karina und ich hend alles gäh, au e gsunds Mass a Vernunft an Tag gleit und en sicher unvergessliche Event iezoge. Uusschlaggebend isch natürli sWetter gsi, too much. Bini happy.
